Первыи книги Моисиовы Бытия.
Первая книга Моисея Бытие.

Глава 1.
На церковнославянском языке русскими буквами (транслитерация).

Искони створи Бог небо и землю.
земля же бе невидима и неукрашена.
и тма верху бездны.
И Дух Божии ношашеся верху воды.
и рече Бог, да будет свет, и бысть свет.
И виде Бог свет яко добро.
И разлучи Бог между светом и между тмою.
И нарече Бог свет день, а тму нарече нощ, и бысть вечер и бысть утро день един.
И рече Бог да будет твердь посреде воды, и будет разлучая посреде воды и воды, и бысть тако.
И створи Бог твердь.
и разлучи Бог между водою, яже бе под твердию.
и посреде воды, яже бе над твердию.
и нарече Бог твердь небо.
и виде Бог яко добро.
и бысть вечер, и бысть утро, день вторый.
И рече Бог, да сберется вода яже под небесем, в совокупление едино.
и да явится суша, и бысть тако.
И сбрася вода яже под небесем в сонмы своя, и явися суша.
И нарече Бог сушу землю, а составы водныя нарече море и виде Бог яко добро.
И рече Бог, да прорастит земля былие травное, сеюще семя по роду и по подобию, и древо плодовито творящее плод, емуже семя его в нем по роду на земли, и бысть тако.
И изнесе земля былие травное, сеюще семя по роду и по подобию и древо плодовито творящее плод, емуже семя его в нем по роду на земли, и виде Бог яко добро.
и бысть вечер и бысть утро день третии.
И рече Бог, да будут светила на тверди небеснеи, освещати землю, и разлучати между днем и между нощию.
И да будут в знамения и в времена, и в дни и в лета.
И да будут в просвещение на тверди небеснеи, яко светити по земли и бысть тако.
И створи Бог две светиле велице светило великое, в начаток дни.
светило же меншее, в начаток нощи и звезды.
И постави их Бог на тверди небеснеи, яко светити по земли, и владети днем и нощию.
И разлучати между светом и между тмою.
И виде Бог яко добро, и бысть вечер, и бысть утро день четвертыи.
И рече Бог, да изведут воды, гады душ живых, и птицы летающа на земли по тверди небеснеи, и бысть тако.
И створи Бог киты великиа, и всяку душу животных гад.
яже изведоша воды по роду их, и всяку птицу пернату по роду.
И виде Бог яко добро.
И благослови я Бог глаголя, раститеся и множитеся, и наполните воды яже в морех, и птицы да умножатся на земли.
И бысть вечер и бысть утро день пятыи.
И рече Бог, да изведет земля душу живу по роду, четверонога и гады, и зверя земли по роду.
и бысть тако, и створи Бог, зверя земныя по роду и скоты по роду их, и вся гады земли по роду их.
И виде Бог яко добро
И рече Бог, створим человека по образу Нашему, и по подобию.
И да обладает рыбами морскими, и птицами небесными, и зверми и скоты, и всею землею, и всеми гады пресмыкающимися по земли.
И створи Бог человека.
По образу Божию створи его.
Мужа и жену створи их.
И благослови их Бог глаголя, раститеся и множитеся и наполните землю, и обладаите ею.
И обладаите рыбами морскими и зверми и птицами небесными, и всеми скоты, и всею землею, и всеми гады пресмыкающимися по земли.
И рече Бог, се дах вам всяку траву семенную сеюще семя иже есть верху земля всея.
И всяко древо иже имать в себе плод семене семенна, вам будет в снедь.
И всем зверем земным, и всем птицам небесным, и всякому гаду пресмыкающемуся по земли, иже имать в себе душу животну, и всяку траву зелену в снедь, и бысть тако.
И виде Бог вся елика створи, и се добра зело.
И бысть вечер, и бысть утро день шестыи.