Первыи книги Моисиовы Бытия.
Первая книга Моисея Бытие.

Глава 9.
На церковнославянском языке русскими буквами (транслитерация).

И благослови Бог Ноя и сыны его, и рече, растетеся и множитеся, и наполните землю, и обладаите ею.
И страх и трепет ваш да будет на всех зверех земных, и на всех скотех, на всех птицах небесных, и на всех движущихся по земли, и на всех рыбах морьских, в руце ваши вдах Я.
И всяк иже есть жив, вам будет в снедь, яко зелие травное дах вам все, точию мяса в крови его душа да не снесте, крови бо вашеи душ ваших, от руки всякого звери изыщу,
И от руки человечески брата изыщу ея.
Проливаяи бо кровь человечу, в неяже место его пролиется, яко в образ Божии створих человека.
Вы же раститеся и множитеся, и наполните землю и множитеся на неи.
И рече Бог Ноеви и сыном его глаголя, се Аз поставлю завет Мои вам, и семени вашему по вас, и всякои души живущеи с вами, от птиц до скота, и всякого звери земнаго иже есть с вами, от всех изшедших ис ковчега,
И поставлю завет Мои к вам, и не умрет всяка плоть ксему от воды потопныя, и не будет потоп ксему на погубление всеи земли.
И рече Бог Ноеви, се знамение завета, еже Аз даю, между Мною и вами, и между всякою душею живою яже есть с вами в роды вечныя.
Дугу Мою на облацех поставлю, и будет знамение завета вечнаго, между Мною и вами и землею.
И будет егда пооблачу облаки землю, и явится дуга Моя на облацех, и помяну завет Мои, еже есть между Мною и вами, и между всякою душею живою, и всякою плотию.
И не будет по сем вода в потоп, яко потребити всяку плоть.
и будет дуга Моя на облацех, и узрю и помяну завет вечныи, иже поставих между Мною и между землею, и между всякою душею живою, и всякою плотию иже есть на земли.
И рече Бог Ноеви, се знамение, завета яже се между Мною, и между всякою плотию яже есть на земли, быша же сынове Ноевы, изшедше ис ковчега, Сим, Хам, Иафет, Хам же бяше отец Ханаань.
Сии суть трие сынове Ноевы, от сих расплодишася по всеи земли, и начат Ное человек делатель быти земли насади виноград, и пи от вина, упися и успе.
И обнажися в дому своем, и виде Хам отец Ханаань наготу отца своего, и изшед вон поведа обема братома своима,
И вземша Сим и Иафет ризу и возложиста ю на обе раме свои
И идоста вспять, и покрыста наготу отца своего, и лице ею вспять зря, и наготы отца своего не видеста.
Истрезви же ся Ное от вина, и разуме елико створи ему сын его юнеишии.
И рече, проклят буди Ханаан, рабом будет братома своима.
И рече, благословен Господь Бог Симов, и будет Ханаан раб ему, и да распространит Бог Афета и да вселится в села Симова, и да будет Ханаан раб его.
Ное же жить по потопе лет, 350. и быша вси дние Ноевы лет 9 сот, и 50. и умрет.