Первыи книги Моисиовы Бытия.
Первая книга Моисея Бытие.

Глава 16.
На церковнославянском языке русскими буквами (транслитерация).

Сара же жена Аврамля, не раждаше ему.
Бяше же раба у нея Египтяныни, сеи имя Агар, рече же Сара к Авраму, се заключи мя Господь не раждати, вниди убо к рабе моеи и родиши от нея.
Послуша же Аврам глаголания Сарина, и поимши жена Аврамля, Агар Египтяныню рабу свою по 10 лете вселениа Аврамля в землю Ханааню, даде ю в жену Авраму мужу своему.
И вниде к Агаре и зачат.
И веде яко в утробе имать, и в укоризне бысть госпожа ея пред нею.
И рече Сара к Авраму, обида ми от тебе, се аз дах рабу мою в руце твои.
она же видевши яко в утробе имать, в укоризне бых от нея, суди Бог между мною и тобою.
Рече же Аврам к Саре, се раба твоя в руку твоею, твори еи якоже ти есть годне.
И бедно еи створи Сара и пробеже от лица ея.
И обрете ю Ангел Господа Бога, у источника воды в пустыни на земли, на пути Сир.
И рече еи Ангел Господень Агар рабо Сарина откуду идеши и камо грядеши.
она же отвеща от лица Сары госпожа моея, аз пробегаю.
Рече же Ангел Господень, обратися к госпожи своеи, и покорися под руку ея.
И рече Ангел Господень, множа умножу семя твое, и не счтется от множества.
И рече еи Ангел Господень, се ты в утробе имаши и родиши сын и наречеши имя ему Измаил.
Яко призре Господь на смирение твое.
Сеи будет полныи человек, руце его на всех и руки всех на нем, и пред лицем всея братиа своея вселится.
И призва Агар имя Господне глаголющаго к неи, Ты Бог иже призре на мя, яко рекох се видех прямо мне видящаго мя, сего ради прозва кладязь тои Кладязь иже пред ними видех се между Кадис и между Варад.
И роди Агар сына Авраму, и нарече Аврам имя сыну своему иже роди ему Агар Измаил Аврам же бе лет 86, егда роди Агар Авраму Измаила.